خاطرة اليوم دا 😉: الصباح اللانكاوي 🔥

خاطرة اليوم دا : الصباح اللانكاوي 

زي اليوم دا 15 مارس بس قبل سنة من الليلة وكان  واقع يوم أحد ( ما الاثنين دي الليلة) .. كان أول صباح لي ( من واقع خمسة صباحات مميزة ) في جزيرة لانكاوي Langkawi والصورة الماسك فيها ال Selfie Stick  دي من قدام فندق fave hotel... طبعا في ناس كتيرة سافرت قبلي إختارتو وانا بدوري  بنصح المسافرين بعدي (وإن شاء الله لما يسافروا تكون الكورونا خلصت من الدنيا ) بنصح المسافرين ديل  ينزلو في الفندق دا .. لانو  الخدمة فيهو مميزة وال Staff بتاع  الفندق  لطيفين  خالص والاكل لذيييييذ .

طبعا دا غير إنو  الفندق قريب شديييد من شاطئ سونتانج ( بتتكتب كدا Centang Beach ) لو الواحد بتقدّل في الشارع اقل من ربع ساعة  بتكون جوه المويه ( حتت الصورة التانية).

تاني ميزة للفندق إنو قريب من الشارع البدخل على السوق الفي المنطقة دي. مشوار ما بعيد يعني بتمشي بالكرعين وشارع الظلط على يمينو وشمالو في  مباني حلوة وشغل مميز بتاع غرافيتي Graffiti بلاقيك هنا وهناك  ( دا للناس الأنا زيهم بحب الجداريات والغرافيتي وظراز المباني).. لو لقيت/ي طريقة جربوا الأكل المحلي بتاع البلد . لكن  لو دايرين الأكلات العالمية المعروفة في السوق بتلقو الماركات العالمية بتاعت المطاعم مرصوصة رص وزيها زي باقي  المناطق اللي ربنا أكرمني وزرتها في ماليزيا ساهل جداً تعرف الاكل الحلال من الاكل الما حلال ( بالنسبة للمسلمات والمسلمين طبعاً) بتلقوا مكتوب عليهو (حلال) بالعربي وناس البلد زاتم لو سألتهم من المكونات بوروكم وكان ساي سمعوا كلمة حلال في طرف لسانكم ما بتحتاجو للسؤال الطويل بتاع مكونات الوجبة. 

لانكاوي رايقة جداً ( مقارنة بالعاصمة التاريخية كوالالمبور) وعشان تستثمر الحكومة الماليزية فيها سياحياَ  وتشجع السياحة فيها ( واصلا لانكاوي بطبيعتها الفاتنة  ما محتاجة للتشجيع دا ) الحكومة الماليزية خلت كل الجزيرة معفاة من الضرائب عشان كدا المعيشة فيها للسياح أرخص من كوالالمبور وإلى حدٍ ما جزيرة بينانج وقريبة من المدينة التاريخية مالاكا ( طبعا بقارن بس بالمناطق الزرتها وقعدت فيها عشان يبقى كلامي دقيق شويه).

لانكاوي فيها معالم سياحية لااازم الحيسافر او حتسافر ليها يشوفا زي مشهد الشلال من فوق التلفريك (Cable Car) وزي مجسم النسر  Eagle Square وبتتكتب كدا(Dataran Lang) بلغة البهاسا ملاي Malay. 

( المهم  لما مارك يذكرني بصور وسلفيهات  مجسم النسر  واللايف العملتو عنو بجي بونسكم بيها) وبرضو لازم تاخدوا الرحلة المائية للأرخبيل ( مجموعة جزر) الما بعيد من لانكاوي زي جزيرة الازر المبتل ( لما مارك يتذكرني بزياتي ليها بحكي ليكم سبب التسمية زي َما حكي لي موظف الفندق وواحد من أبناء المنطقة) وبرضو تشوفو جزيرة العذراء الحامل ( سبب التسمية من شكل الجبال البتلاقيك في مدخل الجزيرة دي) ولازم شركة السياحة البتنظم الرحلة دي يا قول أخوانا المصريين ( يعملو الشويتين بتوعم) ويقولو ليكم في الرحلة دي حتشوفو فقرة ( إطعام النسور) في مويه المحيط.. شوفوها ما بتضر .

كيف تصل للجزيرة الحلوة دي؟ :

في ناس بتسافر لي لانكاوي طيران.. ايوه يتصل سريع ومريح .. لكن نصيحتي ليكم وعن تجربة إذا ما كنت جاييها كشهر عسل.. جرب زي تسافر ليها بالبر حتستمتع بجمال الطبيعية الماليزية والبيوت التقليدية التراثية طول الطريق ..

أخدت بص من ال TBS إختصار ل Terminal Bersepadu Selatan

دي محطة مهمة جداً من المحطات الرئيسية في كوالالمبور للسفر البري بين الولايات. 

من مدينة كوالالمبور لي مدينة كوالا بيرليس  Kuala Perlis

بالبص بتاخد زي تسعة ساعات وشويه ( الشويه دي على حسب مدة السندة (فترة الراحة في الطريق) وبرضو على حسب عمر السواق وممكن حالة الطقس يعني المطر التقيل أكيد حيخلي السواقة تكون أبطأ).

من آخر محطة على المحيط  في مدينة كوالا بيرليس (Jetti Station ) ركبت المعدية Ferry مسافة بتاعت ساعة وشويه في المحيط الهندي كنت وصلت البر.

ومن هناك Jetti Station بتاع لانكاوي بعربية أجرة Grab  زي نص ساعة كدا كنت  وصلت الفندق قبل صلاة العشاء بشويه ( ربطها بزمن الصلاة عشان فرق التوقيت بتاع غرينتش (Greenwich Mean Time) لانو في فرق ستة ساعات بين كوالالمبور والخرطوم... الشمس بتشرق عندهم بدري ياخ  ).

بالجنبة كدا :

طبعاً الونسة عن لانكاوي ما بتخلص ولو واصلت فيها بوستات الفيسبوك كلها َما حتكفيني .. عشان كدا حأقسما وأدى مارك فرصة المبادرة يغرف لي من ذكرياتي في رحلتي:  #رحلة_المدن_الفاتنة وأنا على الونسة 

غير الصور والكلام المكتوب عملت لايفات Facebook live جزء منها متوفر في قناتي بموقع يوتيوب بنفس الاسم ( بالعربي والانجليزي) مزمل الباقر Muzamil Albagir وجزء لسه ما بقى مرفوع   uploaded في يوتيوبي .. عن المعالم السياحية في لانكاوي اللي ربنا وفقني وشفتها شوف العين وبرضو كمان وثقت  لجداريات وغرافيتي وللالعاب النارية البتتعمل في البيتش الرملي  بالليل 

وعملت في لانكاوي  لايفات فيها نقاشات فكرية ( زي العملتها في كوالالمبور) زي كيف نشجع السياحة في السودان من وجهة نظري وأكييييد إتكلمت فيها عن السياسات (Policies) والسياسة (Politics).. طبعا نحن السودانيين بشئ من التعميم بنحب ننظر فيها شديد ) . 

محبتي

ودمتم

مزمل

#muzamilAlbagir #مزمل_الباقر

#رحلة_المدن_الفاتنة #tripofcharmingcities