خواطر #سوداني ‏🇸🇩 ‎عالق في #ماليزيا ‏🇲🇾 ‎(14) : عن (الموت ما بتوالف) ‏

خواطر #سوداني 🇸🇩 عالق في #ماليزيا 🇲🇾 (14) :  عن (الموت ما بتوالف) 

أهلي #السودانيين بقولو ليك ( الموت ما بتوالف) يعني قدر ما تجربي في موت عزيز/ة ليك برضو ما بتقدر تتعود عليهو وتوالفو ويبقى ديمة بصدمك وبحيرك مع إنو الموت حق ويا قول حبوبتي رقية (الله يديها العافية) لما تلقاني مسكورين من جوه بي موت الأحبة تقول لينا بنبرة حازمة بعض الشئ: ( هو الرسول.. مات)  يعني تاني أي زول/ة بموت خلاص وكلما اسمع جملتا دي بتذكر بيت الشعر العربي ( وكل الذي فوق التراب.. تراب) 

مع إني عشت وشفت وجع ال 

Cancer 

في مرض أمي بيهو ورحلة علاجها الطويلة معاهو وصبرها عليهو لما رحلت لي ربنا.. بس لما يجي خبر وفاة أخت صديقة عزيزة جداً بنفس المرض وأتذكر إنو نفس الصديقة دي جاتني في نفس يوم بكا أمي جات تعزيني وشالت معاي الفاتحة بيدها اليمين بس لأنو يدها الشمال كانت في الجبص بتذكر يومداك قلت ليها :والله ما كان في داعي تجي وإيدك مكسورة يعني كان 

ممكن تعزيني بالتلفون. وكان ردها على كلامي إنو عيب تعزيني في أمي بالتلفون ودا واجب وانت ما قعد تقصر مع الناس يا مزمل.. والليلة لما جاني خبر وفاة اختها ربنا يرحمها ويحسن إليها لقيت الساعة عاملة اتنين صباحاً في السودان. 

إلى صديقتي العزيزة جداً ولأسرتها النووية ولأسرتها الممتدة.. ربنا يرحم المتوفية ويحسن إليها ويكون صبرها على المرض القمئ دا كفارة ليها وتلاقي الرحمن الرحيم بدون ذنوب ويسكنها إلى جواره حيث لا مرض ولا حزن ولا موت ولا وجع ولا تعب ربنا يعوضها عن شبابها بالفردوس الأعلى من الجنة ويجبر كسركم ويصبركم ويقويك يا صديقتي.. وأعملي ليها صدقة جارية ودعوات كتيرة من قلوب موجوعة ربنا وحده هو البقدر يجبر كسرها 

شدي حيلك 

محبتي ،،🌹

ودمتم😊

مزمل

#MuzamilAlbagir #مزمل_الباقر #KualaLumpur #كوالالمبور_ماليزيا #رحلة_المدن_الفاتنة #travelbuketlist #travelchannel #rgphoto #natgeoasia #lovemalaysia #prostozpodrozy #the_daily_traveller #travelmalaysia #ngtuk #newyorktimestravel #natgeotravel #natgeoyourshot #bbctravel #yourshotphotographer #malaysia #travelphotography #natgeo #travelasia #bluesky