خواطر #سوداني ‏🇸🇩 ‎عالق في #ماليزيا ‏🇲🇾( 27): لايف تدشين ما بعد منتصف الليل لكتابي الثالث: ( #الشارع_بس ) ‏

خواطر #سوداني 🇸🇩 عالق في #ماليزيا 🇲🇾( 27): لايف تدشين ما بعد منتصف الليل لكتابي الثالث: ( #الشارع_بس ) 

لما دقت الساعة اتنين من صباح الأحد  7  يوليو  2020م ( الساعة 8 مساء السبت 6  يونيو 2020 بتوقيت سودانا) 

دخلت في تجربة جديدة وممتعة لي إني أدشن كتاب أونلاين بعد تجربة تدشين كتابين (أوفلاين).. 

لأني دشنت في قاعة الشارقة  #تضاريس_النزوح_الأخير (دار عزة-2016) 

وفي إتحاد الكتاب #السودانيين دشنت #شاشاية ( دار المصورات - 2017)

طبعاً تدشين كتاب مجموعة المقالات اللي سميتهو تيمناً بالهتاف:   #الشارع_بس . الكتاب دا كان برضو مفروض إدشن أوفلاين في معهد جوته الساعة 6  مساء  السبت 4 أبريل 2020م لكن ربنا أراد بسبب جائحة COVID-19 إنو الكتاب لما  صدر في الخرطوم في شهر مارس  الفات إني إكون في بلد تاني خالص وعاصمة مختلفة جداً عن مدينة مقرن النيلين.. والحمد لله ربنا وقفني في التدشين الأونلاين كأول تجربة لفعالية #مكانك_بيتك اللي بتتنظم من معهد #جوته اللي كنت واحد من طلبته لسنة كاملة في آخر تسعينيات القرن الماضي 

المهم لي الما قدر/ت تتابع أو يتابع اللايف لسبب أو لآخر.. أتكلمت في لايف تدشين #الشارع_بس عن تجربتي مع النشر من أول مقال لي في صحيفة الرأي الآخر اللي عنونتو بي : هموم في بلد الهموم... لحدي آخر مقال كتبته في تالت يوم في عيد الفطر المبارك وختمت بيهو سلسلة مقالات إسمها : #كورونا_السودان.. بين الشد والجذب. 

برضو أتكلمت في اللايف عن عمل إبداعي جديد بكتب في صفحاتو في أيام أمر تقديد الحركة #MCO  فصول رواية حملتها إسم : 

#جالن_إمبي : #رحلة_المدن_الفاتنة 

إن شاء الله ربنا يديني طولة البال والصحة والعمر والقدرة إني أكملها وتلاقي عيون القراء في زمن قريب إلى حد.ٍ ما 

وختمت اللايف بإني بعد ربنا داير أشكر 

المبدع بكرى خضر اللي صمم غلاف #الشارع_بس 

المبدع عاطف الصادق اللي صمم بالجرافيك برومو التدشين 

وأكيد الشكر لمعهد جوته ممثل في سحر صلاح مديرة البرامج الثقافية 

عبد السلام الحاج المسؤول من السوشيال ميديا 

المبدع غسان البلولة اللي صمم بوستر التدشين عبر فعالية #مكانك_بيتك 

لو ما ربنا وفق الناس الجميلين ديل ما كان دا كلو حصل 😉

رابط التدشين عبر حساب معهد جوته Goethe-Institut Sudan 

https://www.facebook.com/goetheinstitut.Sudan/videos/306532817018611/

محبتي ،،🌹

ودمتم😊

مزمل

#رحلة_المدن_الفاتنة